Friday, September 19, 2008

الزمالك يقدر يتأهل.!؟


أنا لسة لحد دلوقتى فاكر أنا زعلت أزاى و انهرت وقعدت أبكى لما الاهلى خسر الدورى 2002/2003
و خده الاسماعيلي بعد ما أتعادلنا مع إنبي على ما أعتقد
لكن الواحد دلوقتى حالا و لأول مرة فى حياتي أتمنى فعلا إن الأهلى يخسر من أسيك فى استاد القاهرة يوم الاحد
طبعا كلكوا عارفين إن الاهلى لو خسر بأى نتيجة من أسيك أبيدجان
الزمالك هيخرج من البطولة وهيودعها
حتى لوكسب ديناموز نتيجة لا تتعدى 4 أو 5 اجوان على الاقل وده لا يمكن يحصل
ممدوح عباس بيقولك فين تكافؤ الفرص عشان الاتحاد الافريقي قرر إن الماتشين فى ميعادين مختلفين
يا عم تكافؤ إيه و انتوا بتتغلبوا بره ووتعادلوا على ملعبكوا
وبعد كده تجيى تقول فين مبدأ تكافؤ الفرص
.......!!؟؟
فعلا حجة البليد مسح السيورة

وزى الناس دى ما قدرت تعمل نفس طعم الكوكا من غير ذرة سكر
الزمالك يقدر يتأهل
أبقى قابلنى
:)


الفيديو ده إهداء خاص منى للزماك من هنــــــــــــــــــــــا

Tuesday, September 16, 2008

تبص على النجوم أزاى ...وأنت واقف على خشبة ..!؟



فى ليلة من الليالي الصافية قرر سقراط أن يتفقد النجوم و الاقمار من منزله
وأثناء ذلك وقع لأنه كان مرتكزا على كرسي ضعيف مهتز
فقالت له الخادمة
يا سيدي ثبت قدميك على الارض أولا ثم تطلع الى السماء
نرجع تانى كده ونركز
هنلاقى إن ده حال الزمالك
فرقة تعبانة ولاعيبة عادية كلهم و حاسين ان هما نجوم
وبينافسوا الاهلى على البطولة وهما بيحاولو يهربوا من المركز الرابع للمجموعة
من الاخر رسالة للزمالك لا تنظر للبطولات و انت لاعيبتك كده وحالتك كده
انا مستغرب من حاجة واحدة بس فى الماتش ان الجونين عبد الواحد متحركش عليهم
الحكم كان غريب جدا فى قراراته
و أثبت فعلا انه من جزيرة شونبونجو بتاعة موبينيل
وطبعا الزمالك لو أتأهل لدور الاربعة و ده طبعا مستحيل هيلاعب بإحتمال كبير أنيمبا النجيري اللى طبعا هيطرقعوه فى نيجيريا وفى القاهرة
كل ده بعد الفوز المستحيل على ديناموز فى زيمبابوى
علما بان الاهلى افلت بتعادل بصعوبة من ديناموز فى زيمبابوى
أبقى قابلنى هأ هأ هأ

نعــم أبوتريــــــكه اخطــأ

نعــم ابوتريــــــــــــــــــــــــكه اخطــأ




اخطأ فى الاعتذار لمثل هذه الجماهير التى لا تستحق لقب جماهير
تخيل أن أكتر من 14000 مشجع بيشتمك
ده اللى ابوتريكة عامله ده اكتر حاجة مؤدبة ممكن تتعمل مع ناس بتشتم من غير أي سبب حتى إن لاعبين الزمالك نفسهم إستغربوا من تصرف جماهيرهم الغير متحضر

اخطأ
فى عدم الاشارة لهم باصبعك او رفعت الحذاء فى وجههم او بصقت عليهم أو شتمت
كما تعودوا عليها من ابناء هذا النادى
وهى أسماء خالدة لاتنسي : مدحت عبد الهادى - عمرو زكى - محمد أبو العلا - حسام وابراهيم حسن .... ألخ الخ
معلش نسيت أكتر واحد ..... شيكابالا
بل أشرت لهم بالسكوت فقط (أهذه جريمه )؟؟؟
و بعد هذا كله اعتذرت لهم ؟؟؟

وفى مواقع الزمالك يقولك أنه خسر حب وتقدير جمهور الزمالك
........أحسن
ابوتريكة مش مستنى تقديرهم وحبهم


هو ده الجون العالمى اللى ثبت عبد الواحد والدفاع كله


Wednesday, July 16, 2008

متفبركة يا باشا



للأسف فيلم ويل سميث الجديد هانكوك مش زى باقي أفلامه الرائعة التانية اللي قصصها كانت مليئة بالتشويق والمفاجآت

الفيلم من أوله مش فهمه خالص و قصته مملة و متكررة كتير يعنى هو كان عايز يعمل زى سبايدر مان و باتمان بس بطريقة كاجوال

وحتى نهاية الفيلم وتخليص الموضوع و حبكة القصة مش مقنعة تماما

والحاجة الوحيدة اللي كانت حلوة في الفيلم هو ويل سميث نفسه وأداؤه لأنه أظلم في الفيلم ده بقصة غريبة ونهاية غير مقنعة تماما لأنه بعد ما مات وأخته ماتت المشهد اللي بعده قاموا هما اللي أتنين وصحيوا عادى خالص

وكملوا حياتهم بسعادة وأنتهي الفيلم نهاية سعيدة واعتقد أن النهايات السعيدة الجميلة دي انتهت خلاص من زمان بقت مملة و ده نفس الملل اللي وجدته



وأنا بتفرج على فيلم ورقة شفرة اللي كنت فكره جامد لكن للأسف نهايته بوظته لأنها تحسها نهاية متفبركة وسريعة للفيلم اللي كان ممكن ينتهي أحسن من كده بكتير أوى لكن أحسن حاجة فى الفيلم هى الاغنية اللى كانت فعلا جامدة

أهو الفيديو


فيلم أحلام الفتى الطائش سيى جدا جدا جدا لأنه ملوش قصة خالص ومش كوميدي أوى يعني والفيلم اى كلام خالص تحس انه فيلم تخرج مش فيلم حقيقي و زى ما تقول كده مضروب فى السريع

Sunday, July 13, 2008

بيضحك على نفسه




من الصفات السيئة جدا ان الانسان يكون بيعمل حاجة غير اللى بيقول عليها

أو بإختصار أنه يكون بيضحك على نفسه وهى دى المشكلة

واكبر مثال على كده قنوات ميلودي اللى عمله حملة كبيرة جدا بقالها فترة بعنوان ميلودي تتحدي الملل

ولكن للأسف قنوات ميلودي نفسها هى أكبر مثال على الملل

كل أفلامهم قديمة جدا جدا وكلها مش معروفة كمان

و الفيلم الجديد اللى يجيبوه يكون معمول من 8 سنين ويعد يقولك حصــــــــرى

مع انه جه على كل قنوات الافلام وناقص شوية ويجي على القناة التانية

لكن الصراحة تتقال الاعلانات جامدة جدا جدا واحسن واحد فيهم اعلان التاكسى

أضرب المربوط يخاف السايب


س1: بما تصف العلاقات المصرية الاسرائيلية؟


ج1: يا بخت من بات مظلوم و مبتش ظالم



س2: بما تفسر الموقف العربى أمام الأوضاع فى غزة؟

ج2: إذا كان الكلام من فضة فالسكوت من ذهب



س3: بما تصف العلاقات المصرية الأمريكية؟


ج3: اللى أكله ما هو من فأسه ... رأيه ما هو من رأسه



س4: بما تصف سياسة مصر الخارجية؟


ج4: دسنا الأرض اللى ما تنداس و بوسنا اليد اللى ما تتباس لا نابنا لا ذهب و لا نحاس



س5: ما هى سياسة مصر الداخليه؟


ج5: أضرب المربوط يخاف السايب



س6: ما هو نظام الحكم فى مصر؟


ج6: سمك لبن تمر هندى



س7: ما هو موقف الأخوان المسلمين من الحكم؟


ج7: عينى فيه و أقول أخيه



س8: بما تفسر الأداء الحكومى المصرى؟


ج8: إن كان هذا يكيدك أنا أزيدك



س9: بما تصف التصريحات الحكوميه؟


ج9: أسمع كلامك أصدقك أشوف أمورك أستعجب



س10: بما تصف زيادة معدل النمو فى مصر؟


ج10: إن كان الكذب حجة فالصدق أنجى



س11: بما تفسر التغيير الوزارى؟


ج11: ايه يعمل الترقيع فى الثوب البالى



س12: بما تصف الأخبار فى الصحافة الحكومية؟


ج12: قالوا الجمل طلع النخلة أدى الجمل و أدى النخله



س13: بما تفسر ميزانية برنامج البيت بيتك؟


ج13: اللى يعوزه البيت يحرم على الجامع



س14: بما تفسر تضخم ثروة أحمد عز؟


ج14: سبحان العاطى الوهاب من بعد الشبشب و القبقاب



س15: ما هو الفرق بين حزب الوفد و حزب الجبهة الديمقراطية؟


ج15: لا تعايرنى ولا أعايرك دا الهم طايلنى و طايلك



و فى النهاية أعزائى بعد ما شفنا قدرة المثل الشعبى المصرى على تلخيص الكثير من القضايا

أحب أنهى حديثى بمثل شعبى أيضا لكنه فى تقديرى كان سبب من أسباب

تعاسة الشعب المصرى ألا و هو:


' اللى تعرفه أحسن من اللى ماتعرفوش'

و طبعا هذا المثل إجابه لسؤال معروف أتركه لذكاء حضراتكم


Tuesday, February 5, 2008

هو بيحب مين ؟


...مزيكا تكنو صوتها عالي

و ناس كتير بتضحك ودوشة..ورغم الاضاءة المزعجة

لفت نظرها وبصت عليه

قربت اكتر وسرحت فيه

سرحت وحلمت
تروح ليه

حلمت تعيش معاه او حتى من حواليه

حتى لو مش هايحس بيها كفاية احساسها ليه

وقالت لنفسها "هو جميل كده ليه"؟


صحيت على همس ليها بيقول

كلنا بنحب القمر والقمر بيحب مين؟

ضحكت وخطفت نظرة سريعة

ورجعت تسرح في القمر من تاني

نسيت شكل صاحب الكلام
لكنها افتكرت كلامه

وكل ماتشوف القمر تفتكر

..."كلنا بنحب القمر بس القمر
بيحب مين"؟

جارة القمــــــــــــــــــر

Sunday, September 9, 2007

ضحكة شريرة


عرفني عليه
احد أعضاء فريق إذاعة حريتنا
واقنعنى به كصديق واف واننى سوف استفيد منه
كثيرا وسوف استمتع به اكثر من اى شىء
انا الصراحة سمعت عنه كتيــــــــــــــر لكنى محبتش اتعرف عليه
بعد كده
اتعرفت عليه وقابلته واستمتعت بلقائه اكثر من اى شى حتى وجدت نفسى اقضى معه الساعات
والساعات
من هو هذا الصديق انه كتاب وبالتحديد سلسة قصص ما وراء الطبيعة
ومؤلفها هوالدكتور أحمد خالد توفيق وبالفعل انها سلسلة قصص خيال علمى
مشوقة جدا مش زى الخيال العلمى اللى هو حرب النجوم والكلام ده لا القصص حلو جدا
وتكوينها ممتاز والنهايات منطقية جدا
وتتحدث هذه السلسلة عن العديد من الاساطير العالمية كأسطورة دراكولا واسطورة الرجل الذئب
وفى بطولة السلسلة د رفعت إسماعيل وهو شخصية خيالية
والذى يعمل كدكتور أمراض الدم
واحسن ما فى هذه القصة انها تحكى باسلوب المتكلم
وهو الدكتور رفعت حيث يحكى القصص وهو يقارب
الستين من عمره فتشعر وكأنه يعطيعك جو الرعب
والخوف .

نرجع تانى شوية كده قبل ما اقرأها قعدت على النت ادور عليها لحد ما لاقيت

مكتبة الكترونية

وقلت احطه هنا للى يحب يقرأها هى حوالى 70 قصة او اكتر
تنزل من على النت منفصلة
و نزلها واقرأها كويس بس اهم حاجة قبل ما تقرأها أتأكد انك قفلت الباب
هاهاهاهاهاهاها ضحكة شريرة

Thursday, August 30, 2007

اتحاد الفراولة



جماهير الزمالك زعلانة ان الاتحاد المصرى
"اللى اطلقوا عليه مسمى اتحاد الفراولة"
عاقب عمرو زكى مهاجم الزمالك بايقاف مباراة وغرامة مالية بعد ما بصق على الحكم وشتمه
ومجلس ادارة نادى الزمالك اعلن انه هايصدر بيان شديد اللهجة ضد الاتحاد المصرى
واوقف التعامل مع احمد شوبير نائب الاتحاد المصرى اعلاميا
و اوقف التعامل مع جميع برامجه
باللى عمله الزمالك ده كده طلع ان الاتحاد هو اللى ظالم وان الاتحاد متحيز والاتحاد اهلاوى
وان عمرو زكى هو المظلوم وهو ضحية نتيجة بطش الاتحاد الاهلاوى الظالم
افرض ان الاتحاد ظالم واهلاوى ومتحيز هو مش مصر كلها شافته على التليفزيون
و هو بيشتم الحكم
و الكاميرا عاملة زووووووووووووم عليه يعنى مفيش اى تزوير او ظلم
ونفتكر كده من كام سنة لما سمير كمونة شتم جماهير فريق اخر عوقب من الاتحاد بسنة ايقاف مش متش واحد
ده المفروض الزمالك هو اللى يعاقب عمرو زكى مش يناصروه ويحسسوه ان اللى عمله هو الصح
وان الاتحاد هو اللى مستقصد الزمالك ولاعبيه
الفيديو جه فى اربع قنوات فضائية وقناتين ارضيتين
ومصر كلها شافته

Wednesday, August 22, 2007

اعلم انك فى المقدمة

مواقع نادى الاسماعيلى و نادى الزمالك مش عارف ليه بتهزىء و تشتم بصراحة فى النادى الاهلى مثلا بعد هزيمة الزمالك فى نهائى الكأس أمام الاهلى قال موقع zamalek.tv
ان الاهلى كسب نتيجة للتحكيم الاحمر ليه بقى لان مش فاكر الصراحة انى حكم طرد محمد ابو العلا فى مباراة ربع النهائى وده طبعا اصر على الفرقة سلبيا
طب ما الزمالك لعب امام الاهلى بمحمد ابو العلا قبل كده عمل ايه يعنى ولا حاجة

وطبعا طلعوا ان الزمالك كان بيكافح لولا ان الحكم الوحش طرد محمد ابو العلا وكانت اوحش حاجة فى التقرير انهم
شبهوا حكم ماتش الزمالك فى ربع النهائى بانه احد الكلاب الحمراء
طب و ده ينفع كل ما حد يخسر يقولك الحكم
هوا ساعات الحكام بيسرحوا شوية بس مش فى كل الماتشات اللى الزمالك يتغلبها يقولك الحكم
وعلى العكس تماما لما تغلب الاسماعيلى على الزمالك فى بداية الدورى المصرى بهدف نظيف قال نفس الموقع

ان الاسماعيلى نادى كبير وانه يملك مدرب ذو فكر عالى و ان لعيبة الاسماعيلى تمييزوا فى اللعب على الاطراف
طب ليه ميقولش ان النادى الاهلى كسب المباراة بعد جهد اللعيبة
وعناء اربع اشواط
ليه فى ماتشات الاهلى اللي بيكسبها بيطلع الحكام خونة والاتحاد متواطىء
وطبعا لا يمكن ان يذكر الاتحاد المصرى لكرة القدم باسمه الرسمى ولكن
يقال له الاتحاد الاحمر أو اتحاد الفراولة
وبيقولك ان الصحفى الكبير ابراهيم حجازى هو
المحامى الدائم للنادى الاهلى
الاهلى مش مستنى صحفى ولا اتنين عشان يناصروه

و حطين عنوان الموقع
ان الزمالك نادى القرن الافريقى الحقيقى
كمان طلعوا الاتحاد الافريقى متواطىء ومتعاون
من الاخر يعنى
ليه ميقولوش ان الزمالك الفترة اللى فاتت دى كان وحش
ومبيلعبش كورة وكله مشاكل
وان الاهلى كان منظم نفسه
و هو اللى كان بيكسب كل البطولات
وقال فى الماتشات جماهير الزمالك بترفع لافتات تقولك
ان الاهلى بيكسب البطولات بالحكام و الحظ

ليه ديما يحاولوا يبرروا الهزيمة بان الاتحاد المصرى والافريقى ولجنة الحكام ووسائل الاعلام والصحفيين كلهم متحدين ضد الزمالك والاسماعيلى ومع الاهلى

وحتى الموقع zamalek.sc قال وبالفعل أصدر النادي الاحمر بيانا منذ قليل أكد فيه ان النادي الأحمر مؤسسة تربوبية ذت قيم ومباديء وحمل نادي المباديء أحد الأداريين واقعة التزوير وكانوا حطين جنب الموضوع وش عمال يضحك
لا يمكن يعنى اما الاهلى يغلط و يصحح الغلطة على الاقل اعترف بالخطأ وصححه وقدم المسؤلين عنه
للتحقيق على الاقل مطنش وتوه الموضوع

واحدى مواقع النادى الاسماعيلى elismaily.com
حط فى الموقع بانر و جزء خاص لفضيحة الاهلى
تخش على فضيحة الاهلى تلاقى بيتكلموا على ماتش ال 3-0
لأ و بيقولك حمل فضيحة صاحب القرن المغرور
وايه يعنى طب ما الاهلى اتغلب ماتش طب ما كل فرق العالم بتخسر على ارضها
طب ما هو الاسماعيلى نفسه أتغلب 4-0 فى استاد الاسماعيلية يعنى فى ارضهم
وقبل كده 6-0
وغلب الزمالك 6/1 و 3/0 و 4/2
عمرنا ما دخلنا على اى موقع للاهلى سواء رسمى أو جماهيرى
ولقنيا فضيحة الاسماعيلى او الزمالك
مفيش تفسير منطقى لكده غير
اذا ركلك الناس من الخلف فاعلم انك فى المقدمة

Tuesday, August 21, 2007

سافعل بك كما فعلت بى يا مالاتيستا

لقد حدث فى الاهلى كما
تقول المسرحية سافعل بك كما فعلت بى يا مالاتيستا

تماما نفس الاهلى عمله فى
الترجى طلع علينا لا قلم زاد ولا قلم نقص تماما

------------------------------------------------

مباراة الاهلى المصرى والهلال السودانى فى بطولة دورى ابطال افريقيا كانت للاسف مباراة سيئة جدا بالنسبة للنادى الاهلى تماما نفس العلقة اللى خدها الترجى وحتى نفس النتيجة بثلاثة اهداف نظيفة ولكن المراة دى فى جون الاهلى

الصحافة السودانية والجماهير كانت وخدة المباراة وكأنها حرب و رئيس نادى الهلال يطلع فى الصحف ومواقع النادى ويشتم فى الحضرى
------------------------------------------------
ده نقلا عن الموقع الرسمى لنادى الهلال
حقق زعيم الكرة السودانية أمس الاول بملعبه بام درمان نصراً كبيراً وقهر ما يسمى بنادي القرن الافريقي الاهلي المصري الذي استفاد بالأمس فائدة كروية وأخذ درساً مجانياً في فنون كرة القدم حيث هزمه الهلال بثلاثة اهداف دون مقابل في بطولة رابطة الاندية الابطال الافريقية ليتصدر الهلال مجموعته بتسع نقاط ويضمن التأهل لدور الاربعة وتنتظره مباراة مع الترجي في تونس والذي تلقى هزيمة امس من اسيك ابيدجان العاجي بهدفين.شوط المباراة الاول جاء قويا وحماسياً ومن جانب فتية الهلال الذين امتلكوا وسط الملعب وقفلوا كل مفاتيح اللعب عند الاهلي وخاصة ابو تريكة الذي لم يستطع فعل اي شيء بالأمس.. وشكل الهلال خطورة كبيرة على
مرمى الحارس( الضعيف) الحضري منذ بداية المباراة
وذلك من خلال تسديدات علاء الدين جبريل وكلتشي واختراقات قودوين من احد
ى تسديداته القوية مزق كرنقو الشباك الاهلاوية بصاروخ ارض ارض ليعلن الهدف الثاني للهلال وذلك في الدقيقة 68 ليتواصل الزحف الهلال نحو مرمى الاهلي في ظل تراجع دفاع الاهلي وانهمرت التسديدات والكرات على الحضري الذي لم يقوى على هذا الاندفاع ومن كرة بينية لكلتشي يجدها قودوين وينفرد بالحضري ويحرز بها الهدف
الثالث وذلك في الدقيقة 84 ليكتفي الهلال بهذه الاهداف الثلاثة وليفلت الاهلي من هزيمة تاريخية كادت ان تصل الى رقم قياسي
ليتصدر الهلال المجموعة بفارق الاهداف والافضلية على الاهلي المصري.التهنئة موصولة من أعضاء موقع الهلال الالكتروني لجماهير ولاعبي ومجلس ادارة الهلال بالانتصار الكبير
---------------------------------

مش عارف ليه يعنى وهى حاجة غريبة ان الاهلى لما يلعب فى بطولة افريقيا مع فرق عربية لازم الاتوبيس يتكسر ويدغدغ ويدمر تدمير كامل نفتكر كل ماتشات الاهلى فى تونس واهو كمان بقينا بنضرب فى السودان ولما رحنا
لعبنا فى ساحل العاج مع اسيك اللاعيبة بتوع الاهلى قالك الجماهير الايفوارية صفقت لهم وهما خارجين

احنا مش
عاوزين لا السودان ولا تونس يصفقولنا عاوزينهم بس ما يكسروش الاوتوبيس !!!!

وكل ميستضيفوا صحفى ويسألوه ايه رأيك فى الكلام ده يقولك ده مصر والسودان شعبين شقيقين واحنا بلد
وحدة وكلنا وادى النيل طيب شعب واحد
ازاى والاهلى اتأخر ساعتين كاملين لحد ما يخرج من ستاد ام درمان اللى الماتش كان فيه لحد ما
خرج تحت حراسة كاملة وقدرت ب 15 الف جند من قوات الامن السودانية لحد ما وصل ا
لفندق بعد الماتش

وطلعوا الصحفيين السودانيين يقولولك لا نيل ولا نيلة
لكن بعد كل ده بردوا مفيش اسباب للهزيمة الساحقة اللى خدها الاهلى
كده بقى الاهلى زى ماتعودنا دخلنا حسبة برمة وكده بقينا لازم نكسب الماتش الجاى و باعلى اهداف
عشان نعد الهلال ونبقى الاول لان الهلال بقى الاول بفرق هدف واحد

لكن نقول الحمد لله ان الاهلى ماتشه الاخير اللى هو الجاى مع اسيك فى مصر فى ستاد القاهرة فى ارض النادى الاهلى لكن على العكس ماتش الهلال الجاى والاخير هايبقى فى تونس مع النادى الترجى بس للاسف اسيك ملوش حل غير الفوز فا هايبقى ميت فى الملعب

بس نقول كلمة حق الاجوان التلاتة احلى من بعض خاصة الجون التالت وفريق الهلال ادى مباراة جيدة واستحق الفوز ولعب احسن

Thursday, August 16, 2007

ارحموا عزيز قوم مل

كفاية ...ياحازم ... كفاية ... ياحازم هو ده اللى قالته جماهير الزمالك لحازم امام لما نزل مباراة الزمالك والاسماعيلى فى الاسبوع الاول فى الدورى المصرى موسم 2007/2008
المباراة انتهت 1-0 للاسماعيلى من الاخر كل الناس شيلو الهزيمة لحازم الطريقة اللى تصرفت بيها جماهير الزمالك مع هذه المشكلة
حركة وحشة جدا ان الجماهير تهتف ضد حازم
ونفتكر اخر ايام هادى خشبة مع النادى الاهلى كان بدأ يفقد لياقته وكان بدأ يكون ثغرة فى دفاع الاهلى ولكن محدش اتكلم ولا حد هتف ضده بل ويوم مهرجان اعتزاله الاستاد اتقفل
لكن من ناحية التانية اللى هى الجماهير بردو حازم امام كان كل ماتش ينزل ميعملش حاجة
ونفتكر ماتش الاهلى والزمالك فى نهائى الكأس حازم كان نازل من اول الماتش الزمالك ماستفدش منه غير انه جاب للزمالك فاول من نص الملعب بس وحازم امام كان ادامه حلين اما يدرب بجدية ويلعب بعزيمة او يعتزل من بدرى

فيلم كده رضا

النهاردة رحت فيلم احمد حلمى كده رضا فى سينما كده ورنا
الفيلم متصنف على انه كوميدى هو يمكن مش مضحك اوى يعنى زى مرجان احمد مرجان لعادل امام او عمر وسلمى لتامر حسنى
بس فيلم كده رضا كان فى فكرة مميزة يمكن محدش فكر فيها قبل وقصة جديدة وموضوع مختلف وجاد على غير العادة بالنسبة لافلام احمد حلمى باستثناء فيلم مطب صناعى الأخير
الشخصيات كانت لذيذة وممتعة جدا واحمد حلمى كان تمثيله رائع فى الثلاث شخصيات وهم : سمسم وهو شخص طيب مهتم بالكمبيوتر – بيبو وهو شخص مهتم بالكورة ومشجع اهلاوى – والشخصية الثالثة وهى الشخصية اللى عجبتنى وهى شخصية البرنس
دور خالد الصاوى وهو دكتور نفسانى كان اكثر من رائع فى التمثيل وادى دوره حلو جدا
منة شلبى تمثيله كان يعنى مقبول
وفى ملحوظة فى كل افلام احمد حلمى نفس المشهد يتكرر فى كل افلام احمد حلمى وهو لما تحصله مشكلة يعد لوحده فى مكان فاضى والكاميرا تتطلع لفوق والموسيقى التصويرية الحزينة تشتغل
من رأيى انا ان فيلم احمد حلمى كان احسن من فيلم مرجان احمد مرجان واللى كان النجم فيه هو احمد مكى اللى هو هيثم دبور
بس مرجان احمد مرجان كان احلى واحسن من عمر وسلمى بالنسبة لفيلم تامر حسنى فهو قصة تامر حسنى فلا يمكن هاننتظر من الفيلم قصة حلوة او موضوع ولكنه كان فيلم الغريب ان الفيلم حقق اعلى ايرادات فى الموسم
اما فيلم محمد سعد اللى هو كركر فيلم سخيف جدا جدا وسيىء واعتقد ان خلاص بقى كفاية بقى الافلام الرخمة دى اللى لا ليها قصة ولا منها فايدة ولا اى حاجة
واحسن حاجة انة حقق ايرادات منخفضة عشان محمد سعد يفوق بقى من الهو فيه ده

Monday, January 1, 2007

بسم الله الرحمن الرحيم

ببدأ اول تدوينة ببسم الله الرحمن الرحيم
اولا احب اشكر
اخى المدون الكبير صاحب مدونة بيت العز

اللى ساعدنى فى انشاء المدونة دى
وشجعنى على الكتابة